ලේසියෙන් ජින්ජර් ඒල් (ජින්ජර් බියර්) ගෙදර හදමු

ජින්ජර් ඒල් (ජින්ජර් බියර්)
රසට ගුණට ලේසියෙන් ගෙදර හදමු

ලේසියෙන් ජින්ජර් ඒල් (ජින්ජර් බියර්) ගෙදර හදමු ! ජින්ජර් ඒල් නැත්නම් ජින්ජර් බියර් හදාගන්න හරිම ලේසියි. අමු ඉගුරු ටිකක් ලේසියෙන් හොයාගන්න පුළුවන්නේ නේද?

මුලින්ම අපි ඉඟුරු ටිකට සීනි එකතු කරලා උණුකරලා ජින්ජර් සිරප් එක හදාගන්නවා. ජින්ජර් සිරප් එකට මී පැණි ටිකක් දෙහි යුෂ ටිකක් එකතු කලාම රස වැඩිවෙනවා ඒ වගේම ගුණත් වැඩිවෙනවා. ඔයාලට කැමති විදියට පැණිරස අඩු වැඩි කරගන්න පුලුවන්. ජින්ජර් ඒල් එක හදන්නේ ජින්ජර් සිරප් එකට ක්ලබ් සෝඩා නැත්නම් ස්පාර්ක්ලින් වෝටර් එකතු කරලා. අයිස් කැට ටිකක් දාල ගත්තම හරිම රසයි.

ඔයාලට ලේසි වෙන්න මේ ජින්ජර් ඒල් රෙසිපි එකේ මම අවශ්‍ය ද්‍රව්‍ය වල ප්‍රමාණය සඳහන් කලා. අවශ්‍ය විදියට ප්‍රමාණය වෙනස් කරන්න පුළුවන්. හරියටම කිරන්න මනින්න අවශ්‍යතාවයක් නැහැ. හදාගත්ත ජින්ජර් සිරප් එක ෆ්‍රිජ් එකේ සතියක් විතර තියාගන්න පුළුවන්.

ජින්ජර් බියර් එකයි ජින්ජර් ඒල් එකයි ටිකක් පැටලෙනවා නේද ?
ඒ නිසා මේ දෙකේ වෙනස දැනගන්න ගූග්ල් කරලා බැලුවා. ජින්ජර් ඒල් එකයි ජින්ජර් බියර් එකයි එක වගේම බීම ජාති දෙකක්. නමට බියර් තිබුනට ජින්ජර් බියර් කියන්නේ බියර් එකක් නෙමෙයි. පාරම්පරික ක්‍රමයට හදන ජින්ජර් බියර් වල ඇල්කොහොල් තියෙනවා. නමුත් ඇල්කොහොල් නැති ජින්ජර් බියරුත් තියෙනවා. නොන් ඇල්කොහොල් ජින්ජර් බියර් එක ජින්ජර් ඒල් වගේම සොෆ්ට් ඩ්‍රින්ක් එකක්. ඒ නිසා මේ දෙක ටිකක් පැටලෙනවා

විකුනන්න තියෙන ජින්ජර් ඒල් වල හුග වෙලාවකට ජින්ජර් තියෙන්නේ නමට විතරයි. ඇත්තටම ජින්ජර් නැත්නම් ඉඟුරු නැහැ. ඇඟට හොඳ ජින්ජර් නැති උනාට ඇඟට හොඳ නැති සීනි රසායනික ද්‍රව්‍ය වගේ දේවල් ගොඩක් තියෙනවා. මොනවද තියෙන්නේ කියල දැනගන්න ලේබලයක් කියවල බලන්නකෝ. එතකොට නම් පිරිසිදුවට රසට ගුණට ගෙදර හදලා බොන්නම හිතෙනවා. එහෙනම් ඉතින් හදලා බලන්නකෝ

ලේසියෙන් ජින්ජර් ඒල් (ජින්ජර් බියර්) ගෙදර හදමු (වීඩියෝ)

ලේසියෙන් ජින්ජර් ඒල් (ජින්ජර් බියර්) ගෙදර හදමු (රෙසිපි)

අවශ්‍ය දේවල්

අමු ඉඟුරු ග්රෑම් 200ක්
වතුර මිලිලීටර් 800ක් *කෝප්ප 3ක් විතර
සීනි ග්රෑම් 100ක්
දෙහි යුෂ මේසහැඳි 1ක්
මී පැණි මේසහැඳි 2ක්

මුලින්ම ඉඟුරු සිරප් එක හදාගනිමු

ඉඟුරු ටික පෙති වලට කපාගන්න
ඉඟුරු පෙති ටික සහ වතුර වලඳකට දමාගන්න
විනාඩි 30ක් පමණ උයාගන්න
ලිපෙන් බාල විනාඩි 10ක් පමණ නිවෙන්න තියන්න
ඉඟුරු වතුර එක නැවත කලින් වලඳට දමා සීනි එකතු කරන්න
හැඳි ගාමින් විනාඩි 10ක් පමණ උනුකරන්න
ලිපෙන් බාගෙන නිවෙන්න තියන්න
දෙහි යුෂ සහ මී පැණි එකතු කරලා හොඳට මිශ්‍ර කරන්න
ඉඟුරු සිරප් එක ලෑස්තියි

දැන් ජින්ජර් ඒල් (ජින්ජර් බියර්) එක හදාගනිමු

වීදුරුවකට අයිස් කැට දමාගන්න
අයිස් කැට වලට උඩින් ඉඟුරු සිරප් කෝප්ප 1/4ක් සහ ක්ලබ් සෝඩා හෝ ස්පාර්ක්ලින් වෝටර් කෝප්ප 3/4ක් විතර දමාගන්න (එකතු කරන ප්‍රමාණය කැමති විදියට වෙනස් කරන්න පුළුවන්)